MES KRAHËVE TË TU DUA TË FUTEM

Dua të marr krahët e shqipes ,
E nëpër largësi të fluturoj,
Dua t’i kthej shpinën dhimbjes, 
Jetën e lumtur të përqafoj.

Dua të thur këngë gazmore,
Në pentagramin e shpirtit tim,
dhimbjen e thellë ta le pasdore,
Se dua pranverën me blerim.

Or, pëllumb krahëshkruar ,
A s’më merr dhe mua me vete,
Të shtegtojmë të bashkuar,
Aty ku ka gëzim mbi tokë e dete.

Të shëtisim duke fluturuar,
Në ato vise ku kam shkelur,
Të kujtoj kohën e shkuar,
Në atë qiellin pa retë nderur.

Të përgjërohem e shumë të lutem,
Mos më lër në vetmi pa caqe,
Mes krahëve të tu dua të futem,
Shpirti të më fluturojë në paqe!...

Luljeta Gjosha Pashollari.
Tirane 1 / 04 /2015